Choose the best hosting by reading users web host reviews. Get the best joomla host online.

Статии

ག༽ བཙུན་མའི་དགུན་ཆོས་ཉིན་གསུམ་པའི་གསུང་ཆོས།

སྲོག་གཅོད་ལྟ་བུར་མཚོན་ན། གཞི་ཕ་རོལ་པོ་སྲོག་གཅད་བྱའི་སེམས་ཅན་དེ་ཉིད་དང་། བསམ་པ་འདུ་ཤེས་དང་། ཉོན་མོངས་དང་། ཀུན་སློང་རྣམ་པ་གསུམ་དུ་གྱུར། འདུ་ཤེས་ལ་འཁྲུལ་མ་འཁྲུལ་གཉིས་སུ་མཆིས་པ་ལས་གཉིས་ཀ་འོང་ཆོག བཀྲ་ཤིས་གསོད་སྙམ་པ་ལ་བློ་བཟང་བཀུམས་ཚེ་འདུ་ཤེས་ཕྱིན་ཅི་ལོག་པས་བསམ་པ་མ་རྫོགས། སེམས་ཅན་གསོད་ཀྱི་ཡིན་སྙམ་ན་ཀུན་སློང་སྤྱི་ཞུགས་ཡིན་པས་འདུ་ཤེས་མ་འཁྲུལ་བས་བསད་པའི་སྡིག་པ་ དངོས་གཞི་འབྱུང་བ་ཡིན། འདིར་འདུ་ཤེས་འཁྲུལ་མ་འཁྲུལ་མི་གཏོགས། ཉོན་མོངས་དུག་གསུམ་ཀུན་ནས་བསླངས་པ་ཞིག་ཡོང་ཆོག དེ་ཡང་འདོད་ཆགས་དང་། ཞེ་སྡང་དང་། གཏི་མུག་གི་ཀུན་ནས་བསླངས་པ་གསུམ་ག་མཆིས། ཀུན་སློང་གསོད་པར་འདོད་པའམ་གསོད་སེམས་ཡིན། སྦྱོར་བ་ལ་གཉིས་ཏེ། རང་གིས་བགྱིས་པ་དང་། གཞན་བགྱིད་དུ་སྩལ་བ། དེ་ཡང་དུག་དང་། མཚོན་དང། རིགས་སྔགས་ཀྱི་སྒོ་ནས་བསྒྲལ་བ་སྟེ་དེ་རྣམས་བཟང་ངན་གྱི་དབྱེ་བ་མེད་པར་དོན་དུ་གཅིག་གྱུར་ཡིན། ཡིད་ཙམ་མ་ཡིན་པར་ལུས་ངག་གི་རྣམ་འགྱུར་གྱི་སྒོ་ནས་རྗེས་སུ་ཡི་རང་བགྱིད་ནའང་ཕམ་པ་འབྱུང་བར་སློབ་དཔོན་ཤཱཀྱ་འོད་ཀྱིས་གསུངས། དེ་བཞིན་འདུལ་བ་འོད་ལྡན་གྱི་གཞུང་ནང་བལྟ་རྒྱུ་ཡོད། མཐར་ཐུག་སྦྱོར་བ་བརྩམས་པ་དེས་ཕ་རོལ་པོ་དེ་ཉིད་རང་གི་སྔོན་དུ་འཆི་ན་མཐར་ཐུག་དངོས་གཞི་ཐོབ་པ་ཡིན། རང་ཉིད་ཕ་རོལ་པོའི་སྔོན་དུ་འཆི་ཚེ་ མཐར་ཐུག་དངོས་གཞི་མ་རྫོགས། རྩ་བ་བཞི་ལས་ཕམ་པ་ལ་དེ་ལྟར་ཡིན་ཡང་སྤྱིར་མི་དགེ་བའི་སྐབས་དེ་ལྟར་ཡིན་མིན་ཆ་མ་འཚལ། མདོ་དྲན་པ་ཉེར་གཞག་ལས། ལམ་དུ་བསྐྱོད་སྐབས་རྐང་འོག་ཏུ་སྲོག་ཆགས་ཤི་བ་དང། ཀུན་སློང་དགེ་བས་སྨན་ལོག་སྦྱིན་སེམས་མེད་ཀྱང་སྨན་ལོག་འཁེལ་བ། ཆོས་རྒྱལ་ཁྲི་སྲོང་ལྡེའུ་བཙན་གྱི་སྲས་མོ་ལྷ་ལྕམ་པདྨོ་ལ་མཛེ་ནད་ཀྱི་སྙུན་གྱིས་མནར་བ་ལྟ་བུ་ཚེ་རབས་སྔ་མའི་རྣམ་སྨིན་ཉམས་སུ་མྱོང་བ། ངག་གི་མི་དགེ་བ་བཞི་ལ་ཡང་གོང་མཚུངས། གཞི་བསམ་སྦྱོར་བ་མཐར་ཐུག་བཞི་ཀ་མཆིས་ཏེ། གཞི་མཐོང་བ་དང་ཐོས་པའི་བྱེ་བྲག་རྣམ་པར་ཕྱེ་ནུས་པ་ཞིག་དགོས། བསམ་པ་འདུ་ཤེས་། ཉོན་མོངས། ཀུན་སློང་གསུམ། འདུ་ཤེས་སྒྱུར་ཏེ་རྫུན་བཤད་འདོད་ཀྱི་བསམ་པ། སྦྱོར་བ་མི་སྨྲ་བའི་སྒོ་ནས་དྭང་དུ་ལེན་པ་སྟེ། ཁ་བརྡ། ལག་བརྡ། མིག་བརྡ་ལ་སོགས་པ་ངག་ནས་མ་བརྗོད་ཀྱང་ཉེས་པར་འགྱུར་བ་ཡིན། མཐར་ཐུག་ཕ་རོལ་པོས་རྫུན་དུ་ཤེས་པ་དང་དོན་གོ་བ། མཐར་ཐུག་གི་ཡན་ལག་མ་ཚང་ན་རྫུན་དེ་ཉིད་ཀྱིས་སྡིག་པར་འགྱུར་ཡང་ལྟུང་བྱེད་མི་འབྱུང། ལུས་ངག་གི་ལས་བདུན་པོར་ཚིག་རྩུབ་གནང་བ་མཆིས་ན། བྱང་ཆུབ་སེམས་དཔའ་ལ་ཉོན་མོངས་ཀྱི་གནང་བ་ཡོད་དམ། གལ་ཏེ་མེད་ཚེ་བྱང་ཆུབ་སེམས་དཔའ་རྣམས་ལ་ལུས་ངག་གི་མི་དགེ་བའི་ལས་བདུན་པོ་གནང་བ་ཡོད་ཅེས་སློབ་དཔོན་ཐོགས་མེད་ཀྱིས་གསུངས། ཡིད་ཀྱི་མི་དགེ་བ་གསུམ་ལ། བརྣབ་སེམས་ཞེས་པ་གང་སྤེལ་དང་། རྒྱལ་སྲས་མའི་འགྲེལ་པར་གཞན་ནོར་བདག་གིར་འདོད་པ་ལས་དེ་མིན་འདོད་པའི་འདོད་ ཆགས་ཐམས་ཅད་ལ་བརྣབ་སེམས་འདྲེས་ཡོད། རང་གི་ལུས་དང་ནོར་ལ་ཆགས་པ་དེ་འདྲའང་འབྱུང་སྲིད། གཞན་གྱི་ནོར་ལ་ཆགས་པ་གཙོ་བོའི་དབང་གིས་གསུངས། ཡིད་ཀྱི་མི་དགེ་བ་སྤྱིར་གནང་བ་མེད་ཀྱང་བྱེ་བྲག་རེ་རེ་ཙམ་གནང་བ་ཡོད། ཐེག་པ་གསུམ་པོ་མཐའ་དག་ཉོན་མོངས་འདུལ་བའི་གཉེན་པོར་མ་གསུངས་པ་གཅིག་ཀྱང་དབེན། གནད་དེ་ལྟར་མཁྱེན་ནས་བོད་དུ་སྡོམ་གསུམ་གྱི་རྣམ་གཞག་སོ་སོར་ཡོད། དཔེར་ན། འཇམ་མགོན་ས་པཎ་གྱིས་མཛད་པའི་སྡོམ་གསུམ། དགེ་ལྡན་ནང་མཁས་གྲུབ་ཐམས་ཅད་མཁྱེན་པས་མཛད་པའི་སྡོམ་གསུམ། སྔ་འགྱུར་རྙིང་མའི་ནང་མངའ་རིས་པཎ་ཆེན་པདྨ་དབང་རྒྱལ་གྱིས་མཛད་པ་དང་། འབྲུག་ཀུན་མཁྱེན་པདྨ་དཀར་པོས་མཛད་པའི་སྡོམ་གསུམ་རྣམ་གཞག སྟག་ལུང་གི་ཕྱོགས་སུ་སྟག་ལུང་ཞབས་དྲུང་ངག་དབང་རྣམ་རྒྱལ་གྱིས་མཛད་པའི་སྡོམ་གསུམ། དེ་བཞིན་ཀཾ་ཚང་གི་ཕྱོགས་སུ་སྡོམ་གསུམ་གྱི་རྣམ་གཞག་རྒྱས་བསྡུས་སྣ་ཚོགས་ཤིག་མཆིས་པ་ལས། འཇམ་མགོན་བློ་གྲོས་མཐའ་ཡས་ཀྱིས་ མཛད་པའི་སྡོམ་གསུམ་གྱི་རྣམ་གཞག་དེ་ཉིད་མཁན་ཆེན་བཀྲ་ཤིས་འོད་ཟེར་གྱིས་བསྐུལ་བ་ཞིག་ཡིན། དེ་ལྟར་བཞེད་པ་སྣ་ཚོགས་ཡོང་དགོས་པ་ནི་ཤིན་ཏུ་གནད་ཆེ་བས་ཡིན། དེ་བཞིན་འབྲི་གུང་ལ་མཚོན་ན། འབྲི་གུང་གི་དགོངས་གཅིག་ནང་མཛད་ཡོད། འབྲི་གུང་དགོངས་གཅིག་ལ་རྗེ་མི་བསྐྱོད་རྡོ་རྗེས་བསྔགས་བརྗོད་ཚད་མེད་མཛད་ཡོད། སྡོམ་གསུམ་མཐའ་དག་ཉོན་མོངས་ཀྱི་གཉེན་པོར་གྱུར་པ་གཅིག་གྱུར་ཡིན། དེ་ཡང་སོ་སོ་ཐར་པའི་སྡོམ་པ་འདོད་ཆགས་ཀྱི་གཉེན་པོ། བྱང་ཆུབ་སེམས་དཔའི་སྡོམ་པ་ཞེ་སྡང་གི་གཉེན་པོ་དང་། གསང་སྔགས་ཀྱི་སྡོམ་པ་གཏི་མུག་གི་གཉེན་པོར་གྱུར་པ་ཡིན། གཏི་མུག་མ་རིག་པ་ཡིན་སྟབས་དེ་ཉིད་ཀྱི་གཉེན་པོར་རིག་པ་ཡེ་ཤེས་བསྟེན་དགོས། དེས་ན་གཏི་མུག་གི་གཉེན་པོར་ཡེ་ཤེས་བསྟན་པ་ཡིན། བུད་མེད་རབ་ཏུ་བྱུང་ཚེ་སངས་རྒྱས་ཀྱི་བསྟན་པ་ལོ་ལྔ་བརྒྱ་འགྲིབ་པར་འགྱུར་ཞེས་བཤད་སྲོལ་ཡོད། འོན་ཀྱང་སངས་རྒྱས་ཀྱི་གསུང་རབ་ནང་དེ་ལྟར་མ་གསུངས་ཤིང། དེའི་ཁ་གནོན་དུ་ལྕི་བའི་ཆོས་བརྒྱད་ཅེས་གསུངས་པ་ཡིན། འཁོར་རྣམ་པ་བཞི་པོ་དེ་སངས་རྒྱས་ཀྱི་བསྟན་པའི་ཁང་ཆེན་འདེགས་པའི་ཀ་བ་བཞི་དང་མཚུངས་ཤིང་། དེའི་རྒྱུ་མཚན་ལ་བརྟེན་ནས་ཐབས་བྱས་པ་ལས་ ངོ་སྲུང་གི་ཕྱིར་མིན།

Photoshop Brushes Joomla 1.7 Themes designed by Baseball Jacke